1998: proiektu baten lehen harria

Klubaren hastapenak ikusi ahal izateko 1998. urtera begira jarri behar gara. Urte horretan igeriketa eskolako partaideak waterpoloan aritzeko proposamena bultzatu zen.

Lehenengo urte horrek zuen helburua, ezezaguna zen kirol praktika bat igerilariei erakustea zen. Urte horren amaierarako waterpoloaren teknika –indibiduala eta taldekakoa- eta araudia ezagutzea zen xedea. Lan hau Javier Vidalek gidatu zuen, waterpolo eskola bat sortuz. Honen inguruan, azpimarratzekoa da Leioako Udaleko Kirol Sailaren laguntza garai honetan, eta baita gurasoek egindako lana. Azken hauek ezinbestekoak izan ziren proiektua aurrera atera ahal izateko.

1999: klubaren debuta lehiaketa ofizialetan, gazteak eta emakumeak abangoardian

Hurrengo urtean, 1999an alegia, era federatu batean lehiatzeko hautua egiten da.  Urrats hau ematea erabaki zen esperientzia honek izan zuen harrera ona eta lortutako emaitza onak ikusita. Urte honetan, beraz, klubeko lehenengo bi taldeak osatu ziren: emakumezkoen taldea, eta beste bat gaztetxoentzat, kadete mistoa. Azken hauek egin zuten klubaren debut ofiziala lehiaketa ofizial batean, Ligan, alegia.

Garai honetan ere, gerora gizonezkoen taldea osatuko zuten partaideek. abiatu zuten euren waterpolo ibilbidea. Lehenengo agerraldiak, Unibertsitate mailako txapelketetan eta lagunarteko partiduetan burutu zituzten.

Klubaren historiako lehenengo urte hauetan, arlo teknikoan Ivaylo Patchaliev bulgariarra eta Santi Agirre deustuarraren laguntza jaso zuen klubak.

2000. urtea: lehenengo emaitzen urtea

2000. urtea lehenengo arrakasten urtea da, bai indibidualak eta baita talde mailan ere. Emakumezkoen taldea erreferente bilakatzen hasten da Euskal Herri mailan eta kadeteek denboraldi bikaina egin zuten.

Gainera, taldeko hiru kadetek Euskadiko selekzioaren deia jaso zuten lehenengo aldiz klubaren historian. Helburua Autonomia Erkidegoen arteko Espainiako Txapelketara joatea zen. Momentu honetatik aurrera ohikoa bihurtuko da selekzioaren deia, bai kadeteetan eta baita emakumezkoetan ere. 2001/2002: jauzi kualitatiboa 2001ean Euskal Herriko Ligan kadeteek bigarren postua lortu zuten. Eskuratutako maila bikaina agerian uzten da euskal selekzioak Leioako bost kadete deitu zituenean. Gerora, selekzio horrek Euskadiko Federazioak inoiz lortutako emaitzarik onena lortu zuen, Espainiako Txapelketan hirugarren postua lortuz, Catalunya eta Madrilen atzetik. Bestalde, talde femeninoak emaitza onak biltzen jarraitzen du, joko erakargarria erakutsiz eta apurka-apurka hazten.

2001/2002 denboraldian klubaren erabateko finkapena eman zen. Hasteko, zuzendaritza teknikoan aldaketa garrantzitsua burutu zen: bi talde absolutuen gidaritza Ekain de la Fuente eta Eduardo Imazi eman zitzaien. Bigarrenik, mutilen talde absolutuak lehenengo aldiz eman zuen izena 2. mailako Euskal Herriko Ligan. Talde hau hiru urte lehenago hasitako gazteek eta hasierako kadeteetako batzuk osatu zuten.

Artean, Vidalek bere lana beheko mailetara eta waterpolo eskolara bideratzen du. Azken hau etengabe hazten doa eta waterpolarien belaunaldi berri bat bidea egiten hasten da. Neska-mutil hauek jokalari moduan garatu ahal izateko 14 urtez azpiko taldea osatzen da, Bizkaia mailan lehiatuko dena. Era berean, denboraldi honen bukaeran Zaragozara joan ziren gaztetxo hauek Rafael Feliz txapelketa jokatzera. Bertan, Estatuko beste talde batzuekin lehiatu ziren, eta egindako lan guztiaren sari moduan hartu zuten. 2002/2003: hasierako proiektuaren sendotzea Hurrengo denboraldian, waterpoloak herrian sustatutako interesak indarra hartu zuen, eta asko izan ziren kirol aukera hau frogatzera animatu zirenak. Garai honetan, lau talde ezberdin zituen klubak, bi talde absolutu, eta gazteen bi talde, bata jubenila eta bestea infantila.

Imaz eta de la Fuentek egindako lanak fruituak ematen hasi zen eta goraipatzeko moduko denboraldia burutu zen. Emakumezkoen taldea Euskal Herriko Liga eta Kopako txapeldunordea izan zen, aurreko urteko emaitza bera, eta gizonezkoen taldeak, berriz, meritu handiko laugarren postua lortu zuen bigarren maila horretan.

Bestalde, antolatzen diren beste txapelketetara joateko ideia mantentzen du klubak, waterpolarien garapenerako egoki irizten baitu. Era honetan, infantilek Zaragozara joaten jarraitzen dute, baina urte honetan emakumezkoen taldeak batu egiten zaie, hiri berdinera joanez beste txapelketa batean lehiatzeko. 

2003/2004: maila hobetuz doa

2003/2004 denboraldirako exijentzia maila igotzea erabakitzen da, aurreko urtean erakutsitako maila ona eta lortutako maila teknikoa ikusita. Horretarako helburu zehatzak finkatzen dira: talde guztientzat, kontzeptu tekniko berriak barneratzea; emakumezkoetan, oraindik lortu gabe dagoen tituluren bat erdiestea (Euskal Herriko Liga edo Kopa); eta gizonezkoetan, lehengo mailarako igoera lortzea. Finkatutako hiru helburu nagusietatik lehenengoa bakarrik lortu ahal izan zen, baina modu honetan jauzi kualitatibo handia eman zen, eta ondorengo denboraldietarako baliagarri izango zen oinarri sendoa finkatuta gelditzen da.

Denboraldi honi bukaera ezinhobea emateko mutilen taldea Galiziara, Padrónera, abiatu zen, bertan txapelketa bat jokatzeko. Taldea garaile suertatu zen bertan.

2004/2005: lehenengo trantsizioa, umeak nagusi egin zirenekoa Hurrengo urtean, eta hiru urteko garai baten ostean Imazek taldea uzten du. Honek, zuzendaritza teknikoan aldaketak dakartza: Mikel Zabalak gizonezkoen ardura hartzen du, eta de la Fuente talde femeninoaren entrenatzaile geratzen da. Denboraldi honetan, bi talde absolutuetan harrobiko jokalariek protagonismoa hartzen dute, talde horietako jokalari garrantzitsu bihurtuz haietako asko, eta gazteek jokatutako minutuek gora eginez. Honen ondorio nagusia, talde absolutuen batez besteko adina asko jaitsi zela, etorkizuna ziurtatuz. Gazteagoen mailetan talde kadete berria jaio zen, Bizkaia mailan lehiatuko dena eta aurreko urteko infantilek osatu zutena. Era berean, waterpolo eskolak, helburu nagusi klubaren harrobia izatea daukanak, hazte prozesuarekin darrai. Gazte batzuk jauzia eman eta talde absolutuekin entrenatzen hasten diren heinean, kide berriak sartzen dira urtez urte.

2005/2006: Lehenengo mailara!!

2005/2006 denboraldian de la Fuentek kluba utzi zuen, lau urtez gure artean egon ostean, eta Zabalak gizonezkoen talde absolutua entrenatzeari utzi zion ere. Bi gertaera hauek aldaketak dakartzate zuzendaritza teknikoan. Denboraldi berrirako Jon Lopéz dator, eta honek bi talde absolutuen ardura hartzen du. Bere zuzendaritzapean aro berria hasten da, aurreko urtean hasitako belaunaldi jauziarekin jarraituz.

Hasiera batean, ezezaguna zen bi talde absolutuei eska ziezaiekeen maila jokalari gazte asko baitzegoen eta entrenatzailea, gainera, iritsi berria baitzen klubera. Baina denboraldi aurreak eskainitako sentsazio positiboak ikusita apustu sendoa egitea erabakitzen da. Urte batzuk lehenago planteatu bezala, mutilen taldearentzat igoeraren helburua finkatzen da, eta nesken taldearentzat, berriz, Kopa edota Ligako tituluen lehian egotea. Mutilen taldeak, erabat betetzen du proposatutako helburua eta bost urtez bigarren mailan egon ostean, Lehenengo Mailarako txartela lortzen du historian lehendabizikoz. Nesken taldeak ere, nolabait, helburua betetzen du, izan ere, azken jardunaldira arte Liga titulua lehiatu baitzuen. Azkenean Santoñakoek, lehia gogorraren ostean, erdietsi zuten titulua Ligako azken partiduan. Bi taldeek puntu berdinekin amaitu zuten Liga, gure taldeak bigarren sailkatuz. Kadeteen taldeari dagokionean, Euskal Herriko Ligan parte hartzen du, probintzia mailan soilik lehiatzeari utziz, honela waterpoloa maila altuagoan garatu ahal izateko. Emaitzak ez ziren onak izan, baina jokalariak heztearen helburua erabat bete zen.

2006/2007: erronka eta ilusio berriak

Bestalde, ezinbestean aipatu behar da gaur egun gure kluba lau taldek osatzen dutela (gizonezkoetan Leioa eta Leioa B, emakumezkoen absolutua, eta infantila), guztira 50 jokalari inguruk parte hartzen dutelarik. Guzti honekin batera, waterpolo eskola hainbat eta hainbat gaztek osatzen jarraitzen du.